jueves, 15 de abril de 2010

Edurne Pasaban puge eth tuc d’Annapurna damb eth supòrt dera Val d’Aran



Dijaus, 15 de Abriu de 2010
 

Era aupinista basca Edurne Pasaban e eth sòn equip pugen eth tuc d’Annapurna, que se tròbe en Nepal a 8.091 mètres de nautada, en ua expedicion que compde damb eth supòrt institucionau deth Conselh Generau e Torisme Val d’Aran. Pasaban pòrte un drapèu aranés, que coronarà eth tuc. Damb eth projècte Desafío 14 x 8.000, era montanhista aspire a convertir-se ena prumèra hemna dera istòria en completar era ascension as catorze tucs mès nauti deth mon.

Pasaban manten un vincle especiau damb era Val d’Aran, pr’amor qu’a devengut era sua tèrra d’entrenaments e descans. Dempús deth sòn prumèr an en Aran, era aupinista a declarat qu’a intencion d’amiar a tèrme bona part des entrenaments ena Val, a on a podut realizar “un entrenament fòrça complèt, damb fòrça activitat d’esquí de montanha, quauques jornades d’esquí aupin en Baquèira, activitats de gimnàs e rocòdrom e fòrça gessudes en biciclèta de montanha”. “Ara en Annapurna me trapi mès fòrta e preparada qu’en ues autes expedicions”, a explicat. 
 
Edurne Pasaban prevé coronar eth Annapurna e dempús se desplaçarà, damb eth sòn equip, entath tuc de Shisha Pangma, que se li a resistit en diuèrses ocasions. Era aupinista, qu’a mostrat era sua predisposicion a collaborar damb es jornades d’innovacion toristica qu’organize eth Conselh, tornarà tara Val en junh tà explicar era sua aventura en Imalàia. 

No hay comentarios: